Танилцуулга

Танилцуулга

УБТЗ нь Монгол Улсын тогтвортой хөгжлийн үзэл баримтлалд нийцсэн “УБТЗ-2030” хөгжлийн хөтөлбөртэй, олон улсын нэр хүндтэй аудитын АО “Прайсвотерхаус Куперс Аудит” компанийн “Санхүүгийн тайлагналын олон улсын стандартыг хангасан” үнэлгээтэй Монгол Улсын нийгэм, эдийн засгийн хөгжилд бодитой хувь нэмэр оруулдаг тээврийн тэргүүлэгч байгууллага юм. УБТЗ ХНН-ийг ОХУ, Монгол Улсын Засгийн газрууд хувь тэнцүү эзэмшдэг бөгөөд Монгол Улсын төмөр замын нийт сүлжээний 90 гаруй хувь нь УБТЗ-ын эзэмшилд байдаг. Мөн өөрийн зүтгүүр, вагоны парк, засвар үйлчилгээний төвүүдтэй. УБТЗ нь Монгол Улсын импорт, экспортын ачаа тээврийн 70 гаруй хувийг зөвхөн дангаараа гүйцэтгэдэг, дэлхийн томоохон зах зээл болох Ази, Европыг холбосон төмөр замын хамгийн дөт гүүр гэдгээрээ давуу талтай. Гол замын урт нь 1111, дэлгэмэл уртаараа 1815 км төмөр замтай.

Бид олон улс, орон нутгийн зорчигчид болон экспорт, импортын ачаа тээврийг хүссэн газарт нь түргэн шуурхай, хямд, найдвартай, аюулгүй тээвэрлэн хүргэж, төмөр замынхаа тээх, нэвтрүүлэх хүчин чадлаас давсан ажил, үйлчилгээг жилээс жилд үзүүлсээр байна. Тухайлбал, УБТЗ-аар 2017 онд 539, 2018 онд 855 транзит тээврийн галт тэрэг дамжин өнгөрсөн бол 2019 онд 1454 дамжин өнгөрсөн. Транзит тээврийг улам нэмэгдүүлэхийн тулд үнэ тарифын ухаалаг уян хатан бодлого барьж, үйлчилгээний чанарыг сайжруулж, өөрийн нутгаар цөөн цагийн дотор хурдан шуурхай дамжин өнгөрөх нөхцөлөөр хангахад бид онцгой анхааран ажиллаж байна. Түүнчлэн, 2018 онд 2.57 сая зорчигчид үйлчилсэн бол 2019 онд 2.8 саяд хүрч нэмэгдлээ. Ачаа тээврийн хувд 2018 онд 25.8 сая тонн байсан бол 2019 онд 28.1 сая тоннд хүрч, нийт ачаа тээврийн 41 хувийг зөвхөн нийгмийн шинж чанартай ачаа эзэлж байгаа нь нийгмийн хариуцлага сайтай, том ажил олгогч байгууллага гэдгийг гэрчилнэ.
Монгол Улсын Засгийн газар, МҮХАҮТ хамтран Монгол Улсын “ТОП-100” аж ахуйн нэгжийг шалгаруулахад УБТЗ ХНН 2019 онд аравдугаарт эрэмбэлэгдэж, энэхүү шагналыг гурав дахь удаагаа хүртлээ. Мөн олон улсын 10 гаруй нэр хүндтэй тээврийн салбарын холбоодын удирдлага, шинжээч нараас бүрдсэн “Алтан сүйх тэрэг” шагналыг зохион байгуулах хорооноос “Төмөр замын салбарын шилдэг компани” номинацийн эзнээр Монгол–Оросын ХНН УБТЗ-ыг тодруулсан. Цаашид бүс нутагтаа орчин үеийн шилдэг найдвартай төмөр замын тээврийн компани байхын төлөө УБТЗ ХНН-ийн 15.8 мянган төмөр замчин хичээн ажиллаж байна. Бидэнтэй харилцан ашигтай хамтран ажиллахыг хүссэн байгууллага, хамт олны өмнө УБТЗ ХНН-ийн үүд үргэлж нээлттэй байх болно.