УБТЗ-ын 16 мянга орчим төмөр замчнаас 10 мянга орчим нь мэргэжлийн бэлтгэгдсэн боловсон хүчин байдаг гэх судалгаа бий. Эдгээр мэргэжилтэй боловсон хүчнийг бэлтгэн нийлүүлдэг улсын хэмжээнд ганцад тооцогдох УБТЗ-ын МСҮТ хичээлийн шинэ жилээ угтан нийт оюутан суралцагчдаа хүлээн авч нээлтийн арга хэмжээгээ зохион байгууллаа.  Нээлтийн арга хэмжээнд УБТЗ-ын Тээврийн хөдөлгөөн, удирдлага хариуцсан Замын орлогч дарга П.Даваапил, Замын даргын зөвлөх, Хөдөлмөрийн баатар, Гавъяат тээвэрчин Р.Раш, МСҮТ-ийн захирал Ё.Отгонсүрэн, Улаанбаатар татах хэсгийн дарга Н.Хуяг-Эрдэнэ, УБТЗ-ын МСҮТ-ийн анхны захирал, Гавъяат тээвэрчин Ю.Идэрчулуун нарын хүмүүс оролцож нийт оюутнуудад хандан үг хэлж сурлага хөдөлмөрийн өндөр амжилт хүсэв. МСҮТ нь 480 хүүхдийн квоттойгоос туслах машинч, илчит тэрэгний засварчин, ачаа вагон хүлээлцэгч, өртөөний жижүүр, холбооны монтёр, замчин, вагон үзэгч, галт тэрэгний үйлчлэгч  гэсэн найман мэргэжлээр 380 орчим оюутан элсүүлээд байгаа аж.  Сонгосон мэргэжлээ эзэмшсэн шиг эзэмшин хөдөлмөрийн зах зээлд үнэ цэнэтэй шалгарсан боловсон хүчин байж өөрийн болон Монголын ирээдүйг бүтээн босгох хариуцлагатай үүргээ нэр төртэй биелүүлэхийг нийт оюутан суралцагчиддаа хүсэе.