Орос-Монголын хилийн зөвлөгөөний протоколын 73 дугаар зүйлийг хэрэгжүүлэх зорилгоор өнгөрсөн сарын 28-30-нд Улаанбаатар хотноо “Оросын төмөр замууд” НХНН ба “Улаанбаатар төмөр зам” ХНН-ийн цахим мэдээлэл солилцох экспертүүдийн ажлын хэсгийн хуралдаан боллоо.
Зөвлөгөөнийг Монголын талаас УБТЗ-ын Тээвэрлэлт, хөдөлгөөн хариуцсан орлогч дарга Д.Жигжиднямаа, Оросын талыг “Оросын төмөр замууд” НХНН-ийн Гаалийн үйл ажиллагааны төвийн хэлтсийн дарга С.А.Захаров ахалж оролцов.
Уг зөвлөгөөнд, Монголын талын мэдээлснээр Тээврийн үйл ажиллагаанд цахим мэдээлэл солилцоог ашиглах, Оросын талын мэдээлснээр олон улсын ба дотоодын тээврийн бичиг баримтыг хуулийн ач холбогдолтой цахим хэлбэрээр бүрдүүлж харилцан дамжуулах, ОХУ-ын Гаалийн холбоо ба “Оросын төмөр замууд” НХНН хамтран Гаалийн холбооны бүсээр төмөр замаар тээвэрлэгдэж байгаа барааны урьдчилсан мэдээллийг дамжуулах, 2015 оны долдугаар сарын 01-ээс ОАХХ-д цогц өөрчлөлт тусгагдсантай холбогдуулан “Оросын төмөр замууд” НХНН ба “Улаанбаатар төмөр зам” ХНН-ийн хооронд байгуулсан гэрээнд нэмэлт өөрчлөлт тусгах, Орос-Монголын хилийн зөвлөгөөний протоколын долдугаар зүйл, 5,6,9,11,12 дугаар хавсралтуудыг мэдээлэл солилцооны тусдаа хэлэлцээр болгон өөрчлөх зэрэг асуудлуудыг хэлэлцэв.
Ажлын хэсэг “Оросын төмөр замууд” НХНН болон “Улаанбаатар төмөр зам” ХНН-ийн EDI системүүдийн хооронд тээврийн бичиг баримтын агуулгаар цахим мэдээлэл солилцох ажлыг туршин хэвшүүлж байнгын ажиллагаанд оруулах хамтарсан төлөвлөгөөний төслийг боловсруулсан. Оролцогчид зөвлөгөөнийг өргөжүүлэн Хятадыг төмөр замуудын экспертүүдийг татан оролцуулах нь зүйтэй гэж үзэв.